ការប្តេជ្ញាចិត្តឆ្នាំថ្មី ឆ្នាំ២០១៩៖ លោក ឱម សាវ៉ាត នាយកប្រតិបត្តិ អង្គការសម្ព័ន្ធភាព ដើម្បីអភិរក្សធនធានជលផល
អង្គការសម្ព័ន្ធភាពដើម្បីអភិរក្សធនធានជលផល (FACT) ត្រូវបានបង្កើតឡើងនៅឆ្នាំ២០០០ និងធ្វើការចុះបញ្ជីជាផ្លូវការនៅក្រសួងមហាផ្ទៃ នៅខែធ្នូ ឆ្នាំ២០០៣ ដោយធ្វើការផ្តោតទៅលើវិស័យជលផល និងបរិស្ថាននៅជុំវិញបឹងទន្លេសាប ទន្លេមេគង្គ និងតំបន់ឆ្នេរនៃប្រទេសកម្ពុជា។ FACT ធ្វើការទាក់ទងទៅលើការចងក្រង និង ពង្រឹងសមត្ថភាពសហគមន៍នេសាទ ការតស៊ូមតិ និងតាមដានលើកំណែទម្រង់នៃគោលនយោបាយដែលទាក់ទងលើវិស័យជលផល។
ក្នុងឆ្នាំ២០១៩នេះ អង្គការ FACT នឹងបន្តអនុវត្តផែនការយុទ្ធសាស្រ្តប្រាំឆ្នាំ (២០១៥-២០១៩) របស់ខ្លួន ដោយប្តេជ្ញាចិត្តយ៉ាងមុតមាំ ដើម្បីឈានទៅសម្រេចឱ្យបាននូវសកម្មភាពសំខាន់ៗដូចខាងក្រោម៖
១. បន្តពង្រឹងអង្គការសហគមន៍មូលដ្ឋាន តាមរយៈការរៀបចំសិក្ខាសាលា និងវគ្គបណ្តុះបណ្តាល ហើយជាពិសេសជម្រុញដល់អ្នកជំនាញថ្នាក់ជាតិទទួលស្គាល់អង្គការសហគមន៍មូលដ្ឋាន។
២. ពង្រឹងបណ្តាញជាមួយអង្គការសង្គមស៊ីវិល និងអង្គការមិនមែនរដ្ឋាភិបាលជាដៃគូ ដែលធ្វើការក្នុង
វិស័យជលផល (បច្ចុប្បន្នមានអង្គការមិនមែនរដ្ឋាភិបាលចំនួន ៤៥)។
៣. ផ្តោតទៅលើសកម្មភាពផ្សព្វផ្សាយ និងការងារអភិរក្សរបស់ខ្លួន នៅលើទីតាំងចំនួន៨៤កន្លែង ជាមួយដៃគូពាក់ព័ន្ធ និងមានការគាំទ្រមូលនិធិពីសហភាពអឺរ៉ុប និងម្ចាស់ជំនួយនានាទៀត។
៤. ពង្រឹងអភិបាលកិច្ចល្អនៅក្នុងវិស័យជលផល ដើម្បីជម្រុញលើកទឹកចិត្តប្រជានេសាទ ឱ្យមានការទទួលខុសត្រូវកាន់តែច្រើនឡើង នៅក្នុងសហគមន៍នេសាទរបស់ខ្លួន។
៥. ធ្វើការបោះពុម្ពផ្សាយ ចែករំលែកករណីសិក្សាអំពីជលផល និងផលប៉ះពាល់បណ្តាលមកពីការប្រែប្រួលអាកាសធាតុ ក៏ដូចជាការបញ្ជ្រាបភាពធនទ្រាំពីការប្រែប្រួលអាកាសធាតុផងដែរ។
៦. ពង្រឹងសិទ្ធិអំណាចរបស់សហគមន៍មូលដ្ឋាន លើកកម្ពស់ជីវភាពរស់នៅរបស់ពួកគេ តាមរយៈការផ្តល់វគ្គបណ្តុះបណ្តាល វគ្គអប់រំវិជ្ជាជីវៈតម្រង់ទិស ដូចជាការបង្កើតរមណីយដ្ឋានទេសចរណ៍ធម្មជាតិ ឬ ការបង្កើតមធ្យោបាយសម្រាប់ធានាដល់ការស្តុកទុកផលិតផលនេសាទបានយូរ។ គោលបំណងសំខាន់ គឺជួយដល់ប្រជានេសាទមូលដ្ឋានឱ្យកាត់បន្ថយការពឹងផ្អែកលើរបរនេសាទតែមួយមុខ។
៧. លើកកម្ពស់គុណភាពនៃផលិតផលនេសាទ ដោយគោរពតាមស្តង់ដាដែលមានការទទួលស្គាល់ត្រឹមត្រូវ។ សហគមន៍នេសាទមូលដ្ឋាននឹងទទួលបានការគាំទ្រ នៅពេលណាផលិតផលរបស់ពួកគេបំពេញបានតាមស្តង់ដា ហើយដូច្នេះ ចំណូលរបស់ពួកគេក៏នឹងកើនទៅតាមនោះដែរ។
៨. ដោយផ្តោតទៅលើសមភាពយេនឌ័រ ធ្វើការពិភាក្សាអំពីការអភិវឌ្ឍសង្គមប្រកបដោយយុត្តិធម៌ត្រឹមត្រូវ និងមានចីរភាព នៅក្នុងគ្រប់គម្រោងទាំងអស់របស់យើង។
៩. លើកកម្ពស់សម្ព័ន្ធភាពផ្ទៃក្នុង ដោយពង្រឹងសមត្ថភាពបុគ្គលិក បង្កើតគណៈគ្រប់គ្រងមួយសម្រាប់សមាជិកក្រុម ហើយធ្វើការបង្កើន និងពង្រឹងសមត្ថភាពរបស់ក្រុមតាមដាន និងវាយតម្លៃហិរញ្ញវត្ថុ ដើម្បីធានាឱ្យមានតម្លាភាព និងភក្តីភាព។
“ផែនការជាក់ស្តែងថ្មីរបស់យើងនឹងផ្តោតសំខាន់ទៅលើអភិបាលកិច្ចល្អ និងរបរចិញ្ចឹមជិវិត ការកែច្នៃផលនេសាទ និងខ្សែច្រវាក់ផលិតកម្មជលផល”