ការប្តេជ្ញាចិត្តឆ្នាំថ្មី ឆ្នាំ២០១៩, ឯកឧត្តម George Edgar, ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា
នៅក្នុងឆ្នាំ២០១៩ យើងនឹងបន្តធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា និងដៃគូសង្គមស៊ីវិល ឆ្ពោះទៅអនុវត្តគោលដៅអភិវឌ្ឍន៍ប្រកបដោយចីរភាព (SDGs) នៅកម្ពុជា។ SDGs ជាក្របខណ្ឌសម្រាប់អ្វីៗគ្រប់បែបយ៉ាងដែលយើងធ្វើនៅកម្ពុជា។ យើងមានបំណងចង់ធ្វើយ៉ាងណាឱ្យកម្ពុជាទទួលបានកំណត់ត្រាល្អនៅក្នុងការសម្រេចគោលដៅអភិវឌ្ឍន៍ប្រកបដោយចីរភាព ដូចគ្នានឹងកំណត់ត្រាដែលប្រទេសនេះទទួលបាននៅក្នុងការសម្រេចគោលដៅអភិវឌ្ឍន៍សហសវត្សរ៍កន្លងមកដែរ។
និយាយឱ្យទូលាយបន្តិច អ្វីដែលសំខាន់ខ្លាំងក្នុងចំណោមរឿងសំខាន់នានាសម្រាប់ឆ្នាំនេះ គឺយើងទាំងអស់ធ្វើយ៉ាងណាត្រូវប្រកាន់ភាពម៉ឺងម៉ាត់ជាមួយបញ្ហាប្រឈម ការគំរាមកំហែង និងវិបត្តិបណ្តាល មកពីការប្រែប្រួលអាកាសធាតុ ហើយយកវាមកឆ្លុះបញ្ចាំងនៅតាមគ្រប់វិធីដែលយើងឆ្លើយតបទៅនឹងបញ្ហាប្រឈមទាំងនោះ។ នៅកម្រិតសាកល យើងក៏ត្រូវតែបង្កើនមហិច្ឆតារបស់យើងឱ្យកាន់តែមានកម្រិតខ្លាំងឡើងថែមទៀតដែរ។
សហភាពអឺរ៉ុបឧបត្ថម្ភគាំទ្រដល់កម្មវិធីធំមួយស្តីពីកំណែទម្រង់វិស័យអប់រំ ដោយផ្តោតសំខាន់ទៅលើការអប់រំមុនកម្រិតបឋមសិក្សា ក្នុងកម្រិតបឋមសិក្សា និងក្នុងកម្រិតមធ្យមសិក្សាចំណេះទូទៅ។ សហភាពអឺរ៉ុបក៏នឹងបន្តគាំទ្រទៀតដែរដល់ក្រសួងសេដ្ឋកិច្ច និងហិរញ្ញវត្ថុ លើកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ ដើម្បីធានាយ៉ាងណាឱ្យមានភាពកាន់តែប្រសើរនៅក្នុងការប្រមូលចំណូល និងចំណាយក្នុងស្រុក ដែលបម្រើប្រកបដោយប្រសិទ្ធភាពដល់សេចក្តីត្រូវការរបស់ប្រជាជន។
បច្ចុប្បន្ននេះ សហភាពអឺរ៉ុបកំពុងស្ថិតក្នុងដំណើរការសម្ពោធដំណាក់កាលថ្មីមួយទៀតនៃការចូលពាក់ព័ន្ធផ្តល់ការឧបត្ថម្ភគាំទ្រដល់វិស័យនេសាទ ទាំងផ្នែកវារីវប្បកម្ម ដែលកម្ពុជានៅមានសក្តានុពលធំ និងផ្នែកនេសាទត្រី។ វាជារឿងសំខាន់ដែលត្រូវធានាយ៉ាងណាឱ្យវិស័យជលផលនេះរួមចំណែកមានប្រសិទ្ធភាពដល់ការចិញ្ចឹមជីវិតរបស់ប្រជាជន និងដល់អាហារូបត្ថម្ភនៅកម្ពុជា។ ប៉ុន្តែ វាក៏មានសារៈសំខាន់ស្មើគ្នាដែរ ដែលគេត្រូវផ្តោតទៅលើការអភិរក្សធនធាន ដើម្បីធានាយ៉ាងណាកុំឱ្យវាត្រូវបានគេទាញយកទៅប្រើប្រាស់លើសសមត្ថភាព ឬរងការបំផ្លិចបំផ្លាញដោយសារតែសកម្មភាពអភិវឌ្ឍន៍នៅតាមតំបន់ជុំវិញទន្លេ និងបឹង។
“យើងតែងតែរៀនសូត្រ មេរៀនជាច្រើន អំពីរបៀបធ្វើការឱ្យបានប្រសើរជាងមុន តាមរយៈការធ្វើការដោយផ្ទាល់ជាមួយរាជរដ្ឋាភិបាល និងអង្គការ សង្គមស៊ីវិល។ ខ្ញុំសូមជូនពរមិត្តអ្នកអាន ពីនេះពីនោះ ឱ្យទទួលបានតែសុភមង្គល ជោគជ័យ និងវិបុលភាព នៅក្នុងឆ្នាំ២០១៩នេះ។”